「廖孖記腐乳皇」近日被食安中心撿出細菌超標，東主廖家冇好似超惡「天然水」咁大反擊，不出幾日已話不堪壓力決定將百年老店結束。查實雖則近年廖孖記第三代主持人廖振建夫婦（左下圖）及第四代廖晃業（Jay Liu，右下圖）成日上鏡上網谷生意兼創新（例如廖太發明蒜蓉腐乳整carbonara意粉到日本推廣成「Chinese cheese」），但由於阿Jay對長笛表演興趣大於祖業，依家生產亦爆出竟係外判而唔係上幾代早上五點起身磨黃豆之後多個steps親力親為精心製作，加上有報導計算過廖孖記位於油麻地閩街一號的六層高物業（地鋪為門市）淨收租都每月可袋廿萬，若果重建由於位置佳更可套現逾2.4億相等於五百幾萬樽腐乳咁多，所以廖孖記結業亦不太出奇，不過對鍾意食腐乳的市民確係可惜，而香港亦因此又少了一様手信及一隻百年品牌。

廖孖記是1905年由廖仕忠兄弟（即左上圖鐵閘及產品標籤上圖像兩位，後人澄清他們並非孖生兄弟只係街坊係咁叫開佢地）創立，最初在官涌街市賣豆腐及豆花，賣剩的做腐乳闖出名堂，仕忠長子廖雄（右上圖左方）在40年代接手後索性專做腐乳成業界龍頭，50年代末月產逾三萬樽營業額逾百萬元（當年係大數目），兩成出口到越南，日本，澳洲及美洲等海外市場，在土瓜灣鴻福街13號亦有支店。廖雄在83年過身前曾任廖氏宗親會及香港荳類製品商會主席，亦係他將老店重建成現時的廖孖記樓（建成年份應係60年代）。